Mujhse pehli si muhabbat meri mehboob na maang

Mujhse pehli si muhabbat meri mehboob na maang

Maine samjha tha ki tu hai to darakhshaan hai hayaat
tera gham hai to gham-e-dahar ka jhagda kya hai
teri surat se hai aalam mein baharon ko sabaat
teri aakhon ke siva duniya mein rakha kya hai
tu jo mil jaaye to taqdir niguun ho jaaye
yun na tha maine faqat chaha tha yun ho jaaye
aur bhi dukh hai duniya mein muhabbat ke sivaa
raahatein aur bhi hai vasl ki raahat ke sivaa

Mujhse pehli si muhabbat meri mehboob na maang

Anginat sadiyonn ke taariik bahimaanaa talism
resham-o-atalas-o-kam khwaab mein bunvaaye hue
jaa-ba-jaa bikte hue kuuchaa-o-baazaar mein jism
khaak mein lithade hue khuun mein nahalaaye hue
jism nikle hue amraaz ke tannuron se
piip behti hui galate hue naasuuron se
laut jaati hai udhar ko bhi nazar kya kiije
ab bhi dil-kash hai tera husn magar kya kiije
aur bhi dukh hai duniya mein muhabbat ke sivaa
raahatein aur bhi hai vasl ki raahat ke sivaa

Mujhse pehli si muhabbat meri mehboob na maang

- Faiz Ahmed Faiz

[darakhshaan = shining; hayaat = life]
[gham-e-dahar = sorrows of the world; aalam = world]
[sabaat = permanence]
[niguun = bow]
[vasl = meeting]
[taariik = dark; bahiimaanaa = dreadful; talism = magic]
[resham = silk; atalas = satin; kam_Khvaab = brocade]
[jaa-ba-jaa = hither-thither]
[litha.De = covered/soaked in]
[amaraaz = diseases; tannuuro.n = ovens]
[piip = puss; naasuur = a wound that won't heal]
[dilkash = heartwarming]

tere pyaar me.n rusavaa hokar jaaye kahaa.N diivaane log

Poetry by Obaidullah Aleem

tere pyaar me.n rusavaa hokar jaaye kahaa.N diivaane log
jaane kyaa kyaa puuchh rahe.n hai.n ye jaane pahachaane log

jaise tumhe.n hamane chaahaa thaa kaun bhalaa yuu.N chaahegaa
maanaa aur bahut aaye.nge tum se pyaar jataane log

kaise dukho.n ke mausam aaye kaisii aag lagii yaaro
ab saharaao.n se laate hai.n phuulo.n ke nazaraane log

kal maatam beqiimat hogaa aaj inakii tauqiir karo
dekho Khuun-e-jigar se kyaa kyaa likhate hai.n afasaane log

jaanate hai.n ye ishq musalasal rog hai aah-o-zaarii kaa
phir bhii usake kuuche me.n jaate hai.n umr gavaane log

kuchh ishq thaa kuchh majabuurii thii so mai.n ne jiivan vaar diyaa

Poetry by Obaidullah Aleem

kuchh ishq thaa kuchh majabuurii thii so mai.n ne jiivan vaar diyaa
mai.n kaisaa zindaa aadamii thaa ik shaKhs ne mujh ko maar diyaa

ye sajaa sajaayaa ghar saaqii merii zaat nahii.n meraa haal nahii.n
ai kaash kabhii tum jaan sako jo us sukh ne aazaar diyaa

mai.n Khulii hu_ii ik sachchaa_ii mujhe jaanane vaale jaanate hai.n
mai.n ne kin logo.n se nafrat kii aur kin logo.n se pyaar kiyaa

vo ishq bahut mushkil thaa magar aasaan na thaa yuu.N jiinaa bhii
us ishq ne zindaa rahane kaa mujhe zarf diyaa pindaar diyaa

ik sabz shaaKh gulaab kii thaa ik duniyaa apane pyaar kii thaa
vo ek bahaar jo aa_ii nahii.n us ke liye sab kuchh haar diyaa

mai.n rotaa huu.N aur aasmaan se taare TuuTate dekhataa huu.N
un logo.n par jin logo.n ne mere logo.n ko aazaar diyaa

vo yaar ho.n yaa mahabuub mere yaa kabhii kabhii milane vaale
ik lazzat sab ke milane me.n vo zaKhm diyaa yaa pyaar diyaa

kuchh din to baso merii aa.Nkho.n me.n

Poetry by Obaidullah Aleem

kuchh din to baso merii aa.Nkho.n me.n
phir Khvaab agar ho jaao to kyaa

koii rang to do mere chehare ko
phir zaKhm agar mahakaao to kyaa

ik aaiinaa thaa so TuuT gayaa
ab Khud se agar sharmaao to kyaa

mai.n tanahaa thaa mai.n tanahaa huu.N
tum aao to kyaa na aao to kyaa

jab ham hii na mahake phir saahib
tum baad-e-sabaa kahalaao to kyaa

jab dekhane vaalaa koii nahii.n
bujh jaao to kyaa jal jaao to kyaa

Khayaal-o-Khvaab hue hai.n muhabbate.n kaisii

Poetry by Obaidullah Aleem

Khayaal-o-Khvaab hue hai.n muhabbate.n kaisii
lahuu me.n naach rahii.n hai.n ye vahashate.n kaisii

na shab ko chaa.Nd hai achchhaa na din ko mehar achchhaa
ye ham pe biit rahii hai.n qayaamate.n kaisii

azaab jin kaa tabassum savaab jin kii nigaah
khi.nchii hu_ii hai.n pas-e-jaanaa.N suurate.n kaisii

havaa ke dosh pe rakkhe hue charaaG hai.n ham
jo bujh gaye to havaa se shikaayate.n kaisii

jo beKhabar ko_ii guzaraa to sadaa ye dii hai
mai.n sang-e-raah huu.N mujh par inaayate.n kaisii

jo aa rahe so vo bhii ab sang-o-Khisht laataa hai
fazaa ye ho to dilo.n kii nazakate.n kaisii

banaa gulaab to kaa.NTe chubhaa gayaa ek shaKhs

Poetry by Obaidullah Aleem

banaa gulaab to kaa.NTe.n chubhaa gayaa ik shaKhs
huaa chiraaG to ghar hii jalaa gayaa ik shaKhs

tamaam rang mere aur saare Khvaab mere
fasaanaa kah ke fasaanaa banaa gayaa ik shaKhs

mai.n kis havaa me.n u.Duu.N kis fazaa me.n laharaa_uu.N
dukho.n ke jaal har-suu bichhaa gayaa ik shaKhs

palaT sakuu.N mai.n na aage ba.Dh sakuu.N jis par
mujhe ye kaun se raaste lagaa gayaa ik shaKhs

muhabbate.n bhii ajiib us kii nafarate.n bhii kamaal
merii tarah kaa hii mujh me.n samaa gayaa ik shaKhs

vo mahataab thaa marham-ba-dast aayaa thaa
magar kuchh aur sivaa dil dukhaa gayaa ik shaKhs

khulaa ye raaz ke aa_iinaa-Khaanaa hai duniyaa
aur is me.n mujh ko tamaashaa banaa gayaa ik shaKhs

aziiz itanaa hii rakho ke jii sa.Nbhal jaaye

Poetry by Obaidullah Aleem

aziiz itanaa hii rakho ke jii sa.Nbhal jaaye
ab is qadar bhii na chaaho ke dam nikal jaaye

mile hai.n yuu.N to bahut aao ab mile.n yuu.N bhii
ke ruuh garmii-e-a.nfaas se pighal jaaye

muhabbato.n me.n ajab hai dilo.n ko dha.Dakaa saa
ke jaane kaun kahaa.N raastaa badal jaaye

rahe vo dil jo tamannaa-e-taazaa tar me.n rahe
Khushaa vo umr jo Khvaabo.n hii me.n bahal jaaye

mai.n vo charaaG-e-sar-e-rahaguzaar-e-duniyaa huu.N
jo apanii zaat kii tanhaaiiyo.n me.n jal jaaye

har ek lahajaa yahii aarazuu yahii hasarat
jo aag dil me.n hai vo sher me.n bhii Dhal jaaye